قصيدة للشاعر حامد زيد ( الجمهرة )

هذي قصيدة مشهورة للشاعر حامد زيد ..

سمعتها واعجبتني ..

وحبيت تشاركوني فيها ..


اي بالله اخطوا والخطا اللي جابهم عين الصواب ..
مبطي وانا اشوف الطمع يكشف رداهم واستره ..

ما يملي عيون الحسود بهالزمن غير التراب ..
ومن لا يتوب من الخطا تحرم عليه المعذره ..

اللي من اولها خراب اكيد تاليها خراب ..
والبندق اللي ما تثور في هدفها تذعره ..

ودك ليا من جاتك الغلطة من الناس القراب ..
الصاحب اللي ما كسبت محبته ما تخسره ..

مشكلتي اني ما عرفت احسب لصدتهم حساب ..
قلّطتهم صدري على ذكري قصيد وحنجره ..

صوت يصول بمنبره وخطاب ما مثله خطاب ..
والطيبه اللي زعزعت صوت الخطيب ومنظره ..

ما فيه دمعٍ صوبوه احبابي بوجهي وخاب ..
ولا زرق حزني على غالي ولا فج نحره ..

كل الزهاب اللي معي ذكرى من اصحاب الزهاب ..
واللي بقى لي من عذاب اشرس طريقي واخطره ..

لانّي تجنبت الغرق عديت من فوق السحاب ..
لان اكثر اصحابي ورق ما شفت للطيب ثمره ..

والله ما حطيت بين الحقد والخوه حجاب ..
حتى غدوا ربعي يحدوني على الضيق اشكره ..

البارحه ثارت علي رقاب وآوتني رقاب ..
البارحه يا ثقل دم البارح ويامااحقره ..

اهب يا وجه الحسد وشلون جمعهم وغاب ..
كيف السنين اللي عطتني بعثرتهم بعثره ..

اثر المصايب ما تجيك الا من الناس القراب ..
وبهالزمن حتى الرفيق اللي تثق فيه احذره ..

لا بارك الله في رفيق تزعله كلمة عتاب ..
ولا جمع الله الرجال اللي تفرقهم مره ..

عودت نفسي كل ما شدّدت لليمّه ركاب ..
ما اصدّ وجهي عن طريق الا ليا جبت خبره ..

الصاحب اللي ما يجي من صحبته غير العذاب ..
نذر علي ان ما هجرني والا انا اللي ابهجره ..

من يفتح لفرقاي باب افك له عشرين باب ..
واذا خويي ما يقدّر خوّتي ما اقدره ..

ان روّحوا فانا برئ منهم ليوم الحساب ..
وان جرّحوا قولوا لهم ما حركوا فيني شعره ..

شفهم لهم حول السنه ولا اخذوا مني جواب ..
أحسن دواء للي يحاول يستفزك تحقره ..

انا جمعت اوراقهم بكتاب واغلقت الكتاب ..
يا وقت لمّ اللي تلمّه وانثر اللي تنثره ..

ما كنت احاتيهم صغير عاد احاتيهم شباب ..
ان ما ذخرني صاحبي لليوم الاسود ما اذخره ..

عقب اكتئاب البارحه ما عاد انا حمل اكتئاب ..
الطيب جرجرني وانا ماني بناقص جرجره ..

اللي يخاف من الظما يترك لنا طرد السراب ..
واللي مهوب قدّ الظلام ووحشته لا يسهره ..

انا تجرعت العطش لين احترق وجهي وذاب ..
انا كسرت بخاطري قبل الصداقه تكسره ..

انا خسرت اللي غيابه غير عن كل الغياب ..
انا غفرت لعالم ما تستحق المغفره ..

انا اكثر انسان تعلم من كثر ما اخطا واصاب ..
انا اخر انسان يتكلم في زمان الثرثره ..

انا القصيد اللي فزع من دفتره مليون ناب ..
وانا الوحيد اللي جمع مليون ناب بدفتره ..

جفني وجرّحها السهر حيلي وهدّتها الصعاب ..
دمعي هدر ضحكي ندر عمري وضيعت اكثره ..

شيّبت بعقول العرب,هيبت روس ما تهاب ..
جمهرت ناس عمرهم ما يعرفون الجمهرة ..

ما صرت ذيب الا لان اللي حواليني ذياب ..
ما كنت اغيب الا لان العفو عند المقدرة ..

ترى حلاتك لاحملت لصاحبك كلمة عتاب ..
إن ما نطقت بها بوجهه ما تذمه بظهره ..

في هالزمن ما يملي عيون الحسود إلاّ التراب ..
ولا الحظيظ الطلقة اللي ما تصيبه تذعره ..

ودك ليا من جاتك الغلطة من الناس القراب ..
الصاحب اللي ما كسبت محبته ما تخسره ..


لتحميل القصيدة بصوت الشاعر اضغط على الرابط
http://file8.9q9q.net/Download/62929179/-------.ram.html


تحياتي

تشكر أخ أسير الدمع

والله مشكور

القصيدة حلوة

وتقبل مروري

الشكر موصول اليك اخي على الذوق الرفيع الذي تجلى من خلال انتقائك لهذه القصيدة الممتازه الرائعه للشاعر الاروع الذي لطالما عشقت اذني ان تسمع اشعاره وعشقت عيني ان تقرأها ... سلمت يمنااااااك

ننتظر ابداعاتك بتلهف وشوق

تقبل مروري

ما يملي عيون الحسود بهالزمن غير التراب ..
ومن لا يتوب من الخطا تحرم عليه المعذره ..


اثر المصايب ما تجيك الا من الناس القراب ..
وبهالزمن حتى الرفيق اللي تثق فيه احذره



أخيرا لقيت كلمات هذه الأبيات
وأحب هاذان البيتان جـــــــــــــدا

تسلم يا أخي على هذه المتابعة الرائعة للشعر من رغم صغر سنك

وتقبل خالص أحترامي ونحن نتظر إبداعاتك
وأولهم "أنا"
بالتوفيق

ما صرت ذيب الا لان اللي حواليني ذياب ..
ما كنت اغيب الا لان العفو عند المقدرة



رووووووعة تسلم

الصاحب اللي ما يجي من صحبته غير العذاب ..
نذر علي ان ما هجرني والا انا اللي ابهجره ..



عقب اكتئاب البارحه ما عاد انا حمل اكتئاب ..
الطيب جرجرني وانا ماني بناقص جرجره

الظاهر كل الأعضاء معجبين بهذه القصيدة
ومتأثرين فيها كمان

والله مشكور يا أخي......

الشكر لكم على مروركم الطيب